DRAUMAR
Draumar hafa fylgt mannkyninu frá örófi alda, og ef litið er í bækur sem tengjast mannkynssögunni fram á þennan dag finnast kaflar þar sem rætt er um drauma, t.d. í Biblíunni, Íslendingasögunum, og  í  forn Egypskum  bókmenntum svo eitthvað sé nefnt. Draumar eru ekki alltaf merkingar miklir það fer alveg eftir aðstæðum, ef aðstæðurnar eru réttar eða hagstæðar þá er mikið að marka drauma , mitt mat er að ekki skuli nokkur vanmeta drauma sína né annara. Hvernig aðstæður eru hagstæðar og hvernig ekki ? Það sem skiptir máli er  hvenær á tíma sólarhringsins dreymt er, mest er mark takandi á draumum sem koma fram á nóttinni, ekki ef liðið er fram á morguninn, eða þegar menn sofna yfir daginn, miklu máli skiptir í hvaða formi þú ert, besta formið er þannig að manneskjan sem dreymir drauminn sé í góðu andlegu jafnvægi , svefntíminn sé nokkuð reglulegur, ekki drukkið mikið kaffi, ekki á sterkum lyfjum eða neytt áfengis. Ef dreymandinn er á kafi í einhverju áhugamáli eða er mikið að hugsa um einhvern einstakling eða ákveðið mál og dreymir um það þá skal hafa ákveðin vara á, eins getur þungmeltur matur haft áhrif, lestur spennandi bókar eða krassandi bíómynd. Mikilvægt er að þegar dreymandinn vaknar að hann skrifi eða leggi vel á minnið drauminn sem hann dreymdi, hvað gerðist nöfn, litir, lykt og einnig hvort dreymandinn sá hluti eða að hann hélt að hann væri þarna. Gott er að fylgjast vel með draumum sínum og taka vel eftir hlutum sem mann dreymir oft og finna út sínar eigin merkingar, það að dreyma eldfjall getur haft 5 mismunandi merkingar hjá 5 aðilum. Fyrir þá sem dreymir mikið er mjög gott að koma sér upp sínu eigin kerfi, ef þú skrifar alltaf drauma þína um leið og þú vaknar og veltir þér upp úr merkingum þeirra, þá kemur þú þér  upp með tímanum þínu eigin draumakerfi og ættir að geta notfært þér það í þínu daglega lífi. Draumaráðningabækur eru margar til og misgóðar og flestar mest gefnar út til skemmtunar en yfirleitt hægt að nota þær til hliðsjónar, en við verðum mest að trúa á okkur sjálf. Margir hafa heyrt um berdreymni og nokkrir þekkja það vel, talið er að íslendingar standi framarlega í berdreymi ef svo má að orði komast, það er mikið til í því við höfum kraftinn frá fjöllunum og myrkrið gefur okkur tækifæri á að vinna með drauma og ýmis andleg málefni. Það er mikið hægt að rita og ræða um drauma ég læt þetta gott heita í bili um mínar hugrenningar um drauma, það er ekki víst að við séum öll sammála en eins og ég hef minnst á hér þá verðum við öll að skapa okkar eigin stíl.

 Júlíus Júlíusson

Hvenær dreymir okkur helst ?

Svefninum má skipta í tvær gerðir sem m.a. einkennast af mismunandi dýpt. Þegar við sofnum byrjar venjulega grunnur svefn af gerð sem kallast NREM (norapid-eye-movement) en þessi svefngerð skiptist í fjóra flokka eftir dýpt (1-4 þar sem 4 er dýpsti svefninn). Spenna í vöðvum, hjartsláttartíðni, öndunartíðni og blóðþrýstingur lækka eftir því sem svefninn verður dýpri og á 4. stigi er erfitt að vekja viðkomandi einstakling. Þessi svefngerð (NREM) nær venjulega yfir 75-80% af svefntímanum en afganginn af tímanum sofum við svokölluðum REM-svefni (rapid-eye-movement). Hann einkennist af enn slakari vöðvum en eru á 4. stigi NREM-svefns, en aftur á móti verður öndunin dýpri og hraðari og einkennandi fyrir þessa svefngerð eru hraðar augnhreyfingar. Þegar við sofum gengur svefninn frá einu stigi til annars og einni svefngerð til annarrar. Okkur dreymir aðallega í REM-svefni og 3. stigi NREM-svefns, en martraðir, svefngöngur og tal upp úr svefni eiga sér stað á 3. og 4. stigi NREM-svefns. Það svefnmynstur sem hér hefur verið lýst breytist með aldrinum en eins og flest í lífinu er það ákaflega einstaklingsbundið. Þannig er afar algengt, en ekki algilt, að svefntíminn styttist með aldrinum. Stig 4 í NREM-svefni hverfur oft alveg og svefninn verður oft órólegri. Þetta verður að teljast eðlilegt og ekkert bendir til að slíkar svefnbreytingar hafi slæm áhrif á heilsufar. Sumum finnast þessar eðlilegu breytingar óþægilegar, álíta að þeir þjáist af svefnleysi og leita að ástæðulausu eftir meðferð. 
 
Magnús Jóhannsson,
prófessor í læknisfræði


 

Draumar og sögur

"svo rætist draumur sem hann er ráðinn"?

Tenglar í Vísindavef Háskólans

Hvaða gildi hafa Dagdraumar ?

Hvað er martröð og hvað orskar hana ?

Er mark að draumum ?

Er hugtakið skírdreymi (lucid dreaming) virt í vísindaheiminum ?

Er hægt að vita hvort mann er að dreyma ?

Þreyttir þurfa hvíld - Doktor.is