Kötturinn étur allt

Einu sinni voru þeir bræður enn á ferð og mættu manni sem hafði dýr í barmi sínum sem þeir höfðu aldrei séð . Þeir spurðu hvað þetta dýr héti og til hvers það væri haft. Maðurinn segir að það sé köttur og drepi hann mýs og eyði þeim úr húsum. Það þykir þeim bræðrum mikil gersemi og spyrja hvort kötturinn sé ekki falur.Maðurinn segir að svo megi þeir mikið bjóða að hann selji þeim hann og varð það úr að þeir keyptu köttinn fyrir geypiverð. Fara þeir svo heim með kisu og láta vel yfir sér.Þegar heim kom mundu þeir eftir því að þeim hafi láðst eftir að spyrja um hvað kötturinn æti ; fara þeir svo þangað sem maðurinn átti heima er seldi þeim köttinn. Var þá komið kvöld og fór einn þeirra upp á glugga og kallaði inn :"Hvað étur kötturinn?"Maðurinn svarar í grannleysi ; "Bölvaður kötturinn étur allt." Með það fóru þeir bræður heim, en fóru að hugsa betur um þetta að kötturinn æti allt. Þá segir einn þeirra:
"bölvaður kötturinn étur allt og hann bróður minn líka," og svo sagði hver þeirra um sig. Þótti þeim ráðlegast að eiga ekki kisu lengi yfir höfði sér,fengu mann til að stúta henni og græddu lítið á kattarkaupunum.


Allir saman

Ef einn þeirra bræðra þurfti að fara eitthvað þá fóru þeir ævinlega allir.Einu sinni fóru þeir í langferð hér um bil þrjár þingmannaleiðir.Þegar þeir voru komnir tvo þriðjunga vegarins mundu þeir eftir því að þeir hefðu ætlað að fá léðan hest til ferðarinnar.Sneru þeir svo heim aftur, fengu hestinn og fóru svo ferðar sinnar.