Jóla og hátíðarkveðja frá Jólavef Júlla til ykkar allra.
Aðfangadagsmorgun, fjórði sunnudagur í aðventu 2023
Það snjóar og það er jólalegt en svalt úti, inni er hlýtt og líka jólalegt, gólfið fengið Þorláksmessukvölds extra vönduðu skúringuna og hvolpurinn á gamla jólaskrautinu kinkar kolli og brosir. En það snjóar líka í sumum hjörtum og það snjóar bara og snjóar eins og segir í texta Braga Valdimars. Hugsum hlýtt til allra, við vitum lítið um hvað er á bakvið andlitsmynd hvers og eins. Það er gott að setjast niður við kertaljós og senda vinum, vandamönnum og þeim sem þið þekkið ekkert eða lítið fallegar hugsanir og biðja allar góðar vættir um að ljósið komi hlýtt, glatt og bjart og bræði snjóinn.
Jólavefurinn þakkar þeim sem hafa af miklum hlýhug styrkt flutning og uppfærslu á vefnum nú í haust nú er rúmlega helmingur af kostnaðinum kominn sem er frábært. Það er ótrúlegt að einhver, jafnvel sem maður þekkir lítið eða alls ekkert ýti á hnappinn styrkja Jólavefinn. Jólavefurinn sendir einnig þakkir til þeirra sem hafa aðstoðað, sent efni og pistla en umfram allt þakkir til ykkar kæru gestir.
Jólavefurinn sendir ykkur hugheilar jóla og nýárskveðjur hvar sem að þið eruð stödd, megi þessi dagur gefa ykkur allt það besta sem hann býður uppá hvar sem þið eruð stödd í heiminum, lífinu, eða trúnni. Megi nýtt ár færa ykkur raunsanna hamingju, ánægjulegar samverustundir, ástrík augnablik, góðan mat, ótal símalausar stundir, mikið af útivist og að heilsa ykkar allra verði góð.
Jólin eru tími gleði, ljóss, friðar, vináttu, góðverka og manngæsku . Töfrar þessa tíma gera það að verkum að við stöldrum við og erum opnari fyrir hjálpsemi og náungakærleik. Bara ef það góða sem einkennir jólatímann gæti flætt yfir á fleiri daga á árinu.
Lifi ljósið, ljósið mun ávallt sigra myrkrið.
