Jólasaga Dickens – Christmas Carol er ein kunnasta jólasaga veraldar, en boðskapur hennar er sígildur og á alltaf við. Jólasaga Dickens kom fyrst út 19. desember 1843 með teikningum eftir John Leech. Charles Dickens kallaði söguna lengi vel „litlu jólaskrudduna“, en bókin varð strax happasæl og seldist í yfir sex þúsund eintökum fyrstu vikuna, sem kom sér vel fyrir buddu Dickens sem upphaflega skrifaði jólasöguna til að borga niður skuldir. Samtímamenn Dickens gerðu athugasemdir við vinsældir sögunnar og sögðu hana spila vafasamt hlutverk í endurskilgreiningu á mikilvægi jólanna og viðhorfum til hátíðarinnar, en Jólasaga Dickens var skrifuð á þeim tíma þegar eldri jólahefðir voru á undanhaldi.

Sagan gerist í London og fjallar um gamlan nirfil að nafni Ebenezer Scrooge. Scrooge er ríkur og gráðugur viðskiptamaður sem ber enga hlýju til annars fólks, býr einn, heldur ekki upp á jólin, neitar að hjálpa fátæklingum sem til hans leita.
Hann þrælar út skrifara sínum, Bob Cratchit, fyrir lúsarlaun. Jólanótt eina er Scrooge vitjað af draugi fyrrum viðskiptafélaga síns, Jacob Marley, sem segir honum að hann hafi verið dæmdur til eilífrar útskúfunar og kvala eftir dauða sinn þar sem hann hafi stundað sömu iðju og Scrooge.  Marley tilkynnir Scrooge að hann eigi von á heimsókn þriggja anda jólanna sem muni hjálpa honum að bæta ráð sitt og forðast þannig glötun.

Jólasaga Dickens er sígild jólalesning, en hefur einnig verið ótal sinnum fest á filmu fyrir sjónvarp og kvikmyndahús.

Hér að neðan má finna 12 útgáfur af kvikmyndinni í fullri lengd sú fyrsta gerð 1910. Að auki er Sýnishorn af fimm.