Lítil jólakveðja frá Cuxhaven í Þýskalandi 

Ég heiti Kristín Valsdóttir og er fædd og uppalin á Dalvík. Frá því í byrjun árs 2016 hef ég búið í Cuxhaven, í norður Þýskalandi með eiginmanni mínum Eiríki Páli Aðalsteinssyni. Saman eigum við Styrmi Stein, tveggja ára, sem unir sér vel á þýskum leikskóla og spjallar við ömmur og afa í gegnum símann til þess að læra og viðhalda góðri íslensku. 

Ég vinn sem vörumerkjastjóri hjá lyfjafyrirtæki og Eiríkur selur íslenskan fisk um Evrópu alla. Við hugsum heim á hverjum degi en á sama tíma líður okkur vel við Norðursjóinn. 

Jólahefðir í Þýskalandi eru misjafnar eftir Bundeslöndum (16 sýslur).
Að kvöldi 5. desember pússa börnin stígvélin sín og setja þau út við hurð. Aðfaranótt 6. desember kemur svo Nikulaus á asnanum sínum og fyllir stígvélin af súkkulaði, mandarínum og hnetum og stundum laumar hann lítilli gjöf með ofan í. Jólasveinninn (der Weihnachtsmann) kemur svo með jólagjafirnar á aðfangadag. Þjóðverjar borða gjarnan pylsur, önd eða gæs ásamt rauðkáli og kartöflum að kvöldi aðfangadags.

Þjóðverjar eru þekktir fyrir fallega jólamarkaði og óhóflega drykkju á Glühwein sem er ómissandi hluti af aðventunni. Að ógleymdum Lebkuchen sem líkja má við mjúkar hjartalaga piparkökur, hjúpaðar súkkulaði og fylltar apríkósumarmelaði. 

Í þau skipti sem við höfum haldið jólin úti höfum við haldið í íslenskar jólahefðir, borðað íslenskan jólamat og möndlugraut. Styrmir Steinn fær í skóinn og við borðum heimagerðar Sörur og aðrar smákökur. Svo erum við svo heppin að eiga litla íslenska ,,fjölskyldu” úti sem hefur boðið okkur í skötu og laufabrauðsgerð. 

Jólin í Þýskalandi eru róleg og ljúf en jólin heima á Íslandi með fjölskyldunum okkar eru alltaf best ❤️🎄

Við óskum öllum gleðilegrar jólahátíðar með von um gæfu og frið á nýju ári. 

Kristín, Eiríkur og Styrmir Steinn